dots-menu
×

Home  »  The Oxford Book of French Verse  »  2. Pastourelle

St. John Lucas, comp. (1879–1934). The Oxford Book of French Verse. 1920.

Auteur Inconnu XIIIe Siècle

2. Pastourelle

DE Saint-Quentin a Cambrai

Chevalchoie l’autre jour.

Lés un boisson esgardai,

Touse i vi de bel atour:

La colour

Ot fresche com rose en mai.

De cuer gai

Chantant la trovai

Ceste chansonnete:

‘En non Deu, j’ai bel ami,

Cointe et joli,

Tant soie je brunete.’

Vers la pastoure tornai,

Quant la vi en son destour,

Hautement la saluai,

Et dis ‘Deus vos doinst bon jour

Et honour!

Celle ke ci trové ai,

Sans delai

Ses amis serai.’

Dont dist la doucete:

‘En non Deu, j’ai bel aml

Cointe et joli,

Tant soie je brunete.’

Delés li seoir alai,

Et li priai de s’amour.

Celle dist: ‘Je n’amerai

Vos ne autrui par nul tour,

Sens pastour

Robin, ke fiancié l’ai.

Joie en ai,

Si en chanterai

Ceste chansonnete:

‘En non Deu, j’ai bel ami,

Cointe et joli,

Tant soie je brunete.’