dots-menu
×

Home  »  The Oxford Book of French Verse  »  22. Ballades

St. John Lucas, comp. (1879–1934). The Oxford Book of French Verse. 1920.

Charles D’Orleans 1391–†1465

22. Ballades

iii

PRIEZ pour paix, douce Vierge Marie,

Reine des cieux et du monde maistresse,

Faites prier, par vostre courtoisie,

Saints et saintes, et prenez vostre adresse

Vers vostre fils, requérant sa hautesse

Qu’il lui plaise son peuple regarder

Que de son sang a voulu racheter,

En deboutant guerre qui tout desvoie;

De prières ne vous veuillez lasser,

Priez pour paix, le vrai trésor de joie.

Priez, prélats et gens de sainte vie,

Religieux, ne dormez en paresse,

Priez, maistres et tous suivant clergie,

Car par guerre faut que l’estude cesse;

Moustiers destruits sont sans qu’on les redresse,

Le service de Dieu vous faut laisser,

Quand ne pouvez en repos demeurer;

Priez si fort que briefment Dieu vous oie,

L’Eglise veut à ce vous ordonner;

Priez pour paix, le vrai trésor de joie.

Priez, princes qui avez seigneurie,

Rois, ducs, comtes, barons pleins de noblesse,

Gentils hommes avec chevalerie;

Car meschants gens surmontent gentillesse;

En leurs mains ont toute vostre richesse,

Debats les font en haut estat monter,

Vous le pouvez chascun jour voir à clair,

Et sont riches de vos biens et monnoie,

Dont vous deussiez le peuple supporter;

Priez pour paix, le vrai trésor de joie.

Priez, peuples qui souffrez tyrannie,

Car vos seigneurs sont en telle faiblesse

Qu’ils ne peuvent vous garder pour maistrie,

Ni vous aider en votre grand destresse;

Loyaux marchands, la selle si vous blesse

Fort sur le dos, chacun vous vient presser

Et ne pouvez marchandise mener,

Car vous n’avez sûr passage ni voie,

En maint péril vous convient-il passer;

Priez pour paix, le vrai trésor de joie.

ENVOI

Dieu tout-puissant nous vueille conforter

Toutes choses en terre, ciel et mer,

Priez vers lui que brief en tout pourvoie;

En lui seulement est de tous maux amender;

Priez pour paix, le vrai trésor de joie.