dots-menu
×

Home  »  The Oxford Book of French Verse  »  64. Odes

St. John Lucas, comp. (1879–1934). The Oxford Book of French Verse. 1920.

Pierre de Ronsard 1524–†1585

64. Odes

ii

O FONTAINE Bellerie,

Belle fontaine cherie

De nos Nymphes quand ton eau

Les cache au creux de ta source

Fuyantes le Satyreau,

Qui les pourchasse à la course

Jusqu’au bord de ton ruisseau:

Tu es la Nymphe eternelle

De ma terre paternelle:

Pource en ce pré verdelet

Voy ton Poëte qui t’orne

D’un petit chevreau de lait,

A qui l’une corne

Sortent de front nouvelet

L’Esté je dors ou repose

Sus ton herbe, où je compose,

Caché sous tes saules vers,

Je ne sçay quoy, qui ta gloire

Envoira par l’univers,

Commandant à la Memoire

Que tu vives par mes vers.

L’ardeur de la Canicule

Ton verd rivage ne brule,

Tellement qu’en toutes pars

Ton ombre est espaisse et druë

Aux pasteurs venans des parcs,

Aux bœufs las de la charruë,

Et au bestial espars.

Iô, tu seras sans cesse

Des fontaines la princesse,

Moy celebrant le conduit

Du rocher percé, qui darde

Avec un enroué bruit

L’eau de ta source jazarde

Qui trepillante se suit.