Verse > Anthologies > Heathcote William Garrod, comp. > The Oxford Book of Latin Verse
See also: Horace Quotations
  PREVIOUS NEXT  
CONTENTS · BIBLIOGRAPHIC RECORD
Heathcote William Garrod, comp. (1878–1960).  The Oxford Book of Latin Verse.  1912.
 
Romanae fidicen lyrae
 
Horace (65 B.C.–8 B.C.)
 
 
QVEM tu, Melpomene, semel
  nascentem placido lumine uideris,
illum non labor Isthmius
  clarabit pugilem, non equos inpiger
 
curru ducet Achaico        5
  uictorem, neque res bellica Deliis
ornatum foliis ducem,
  quod regum tumidas contuderit minas,
 
ostendet Capitolio:
  sed quae Tibur aquae fertile praefluunt,        10
et spissae nemorum comae
  fingent Aeolio carmine nobilem.
 
Romae principis urbium
  dignatur suboles inter amabilis
uatum ponere me choros,        15
  et iam dente minus mordeor inuido.
 
o testudinis aureae
  dulcem quae strepitum, Pieri, temperas,
o mutis quoque piscibus
  donatura cycni, si libeat, sonum,        20
 
totum muneris hoc tui est,
  quod monstror digito praterenuntium
Romanae fidicen lyrae:
  quod spiro et placeo, si placeo, tuom est.
 

CONTENTS · BIBLIOGRAPHIC RECORD
  PREVIOUS NEXT  
 
Loading
Click here to shop the Bartleby Bookstore.

Shakespeare · Bible · Strunk · Anatomy · Nonfiction · Quotations · Reference · Fiction · Poetry
© 1993–2014 Bartleby.com · [Top 150] · Subjects · Titles · Authors