Heathcote William Garrod, comp. (1878–1960). The Oxford Book of Latin Verse. 1912.

Quintus Ennius 239–169? B.C.

Cassandra. ii

MEA mater grauida parere se ardentem facem

uisa est in somnis Hecuba; quo facto pater

rex ipse Priamus somnio mentis metu

perculsus curis sumptus suspirantibus

exsacrificabat hostiis balantibus.

tum coniecturam postulat pacem petens

ut se edoceret obsecrans Apollinem

quo sese uertant tantae sortes somnium.

ibi ex oraclo uoce diuina edidit

Apollo puerum primus Priamo qui foret

postilla natus temperaret tollere:

eum esse exitium Troiae, pestem Pergamo.