Heathcote William Garrod, comp. (1878–1960). The Oxford Book of Latin Verse. 1912.

Ausonius c.310–c.395

Epitaphs of Heroes

i

Menelaus

FELIX o Menelae, deum cui debita sedes

decretumque piis manibus Elysium,

Tyndareo dilecte gener, dilecte Tonanti,

coniugii uindex, ultor adulterii,

aeterno pollens aeuo aeternaque iuuenta

nec leti passus tempora nec senii.

ii

Deiphobus

PRODITVS ad poenam sceleratae fraude Lacaenae

et deformato corpore Deiphobus

non habeo tumulum, nisi quem mihi uoce uocantis

et pius Aeneas et Maro conposuit.