Verse > Geoffrey Chaucer > Complete Poetical Works
Geoffrey Chaucer (c. 1340–1400).  The Complete Poetical Works.  1894.
The Minor Poems
XXI. Appendix: Against Women Unconstant

MADAME, for your newe-fangelnesse,
Many a servaunt have ye put out of grace,
I take my leve of your unstedfastnesse,
For wel I wot, whyl ye have lyves space,
Ye can not love ful half yeer in a place;        5
To newe thing your lust is ever kene;
In stede of blew, thus may ye were al grene.
Right as a mirour nothing may enpresse,
But, lightly as it cometh, so mot it pace,
So fareth your love, your werkes bereth witnesse.        10
Ther is no feith that may your herte enbrace;
But, as a wedercok, that turneth his face
With every wind, ye fare, and that is sene;
In stede of blew, thus may ye were al grene.
Ye might be shryned, for your brotelnesse,        15
Bet than Dalyda, Creseide or Candace;
For ever in chaunging stant your sikernesse,
That tache may no wight fro your herte arace;
If ye lese oon, ye can wel tweyn purchace;
Al light for somer, ye woot wel what I mene,        20
In stede of blew, thus may ye were al grene.


Shakespeare · Bible · Strunk · Anatomy · Nonfiction · Quotations · Reference · Fiction · Poetry
© 1993–2015 · [Top 150] · Subjects · Titles · Authors · World Lit.