| |
| AMANG the birks sae blythe an’ gay, | |
| I met my Julia hameward gaun; | |
| The linties chantit on the spray, | |
| The lammies loupit on the lawn: | |
| On ilka swaird the hay was mawn, | 5 |
| The braes wi’ gowans buskit bra’, | |
| An’ evening’s plaid o’ gray was thrawn | |
| Out ower the hills o’ Gallowa’. | |
| |
| Wi’ music wild the woodlands rang, | |
| An’ fragrance winged alang the lea, | 10 |
| As down we sat the flowers amang, | |
| Upon the banks o’ stately Dee. | |
| My Julia’s arms encircled me, | |
| An’ saftly slade the hours awa’, | |
| Till dawning coost a glimm’rin’ e’e | 15 |
| Upon the hills o’ Gallowa’. | |
| |
| It isna owsen, sheep, an’ kye, | |
| It isna gowd, it isna gear, | |
| This lifted e’e wad hae, quo’ I, | |
| The warld’s drumlie gloom to cheer; | 20 |
| But gi’e to me my Julia dear, | |
| Ye powers wha rowe this yirthen ba’, | |
| An’ O, sae blythe through life I ’ll steer, | |
| Amang the hills o’ Gallowa’. | |
| |
| When gloamin’ daunders up the hill, | 25 |
| Ah’ our gudeman ca’s hame the yowes, | |
| Wi’ her I ’ll trace the mossy rill | |
| That through the muir meand’ring rows; | |
| Or tint amang the scroggie knowes, | |
| My birken pipe I ’ll sweetly blaw, | 30 |
| An’ sing the streams, the straths, and howes, | |
| The hills an’ dales o’ Gallowa’. | |
| |
| An’ when auld Scotland’s heathy hills, | |
| Her rural nymphs an’ jovial swains, | |
| Her flowery wilds an’ wimpling rills, | 35 |
| Awake nae mair my canty strains; | |
| Where friendship dwells an’ freedom reigns, | |
| Where heather blooms an’ muircocks craw, | |
| O, dig my grave, and lay my banes | |
| Amang the hills o’ Gallowa’. | 40 |
| |
