Verse > Anthologies > T. H. Ward, ed. > The English Poets > Vol. V. Browning to Rupert Brooke
Thomas Humphry Ward, ed.  The English Poets.  1880–1918.
Vol. V. Browning to Rupert Brooke
The Counterblast Ironical
By Robert Louis Stevenson (1850–1894)
IT’S strange that God should fash to frame
  The yearth and lift sae hie,
An’ clean forget to explain the same
  To a gentleman like me.
Thae gusty, donnered ither folk,        5
  Their weird they weel may dree;
But why present a pig in a poke
  To a gentleman like me?
Thae ither folk their parritch eat
  An’ sup their sugared tea;        10
But the mind is no’ to be wyled wi’ meat
  Wi’ a gentleman like me.
Thae ither folk, they court their joes
  At gloamin’ on the lea;
But they’re made of a commoner clay, I suppose,        15
  Than a gentleman like me.
Thae ither folk, for richt or wrang,
  They suffer, bleed, or dee;
But a’ thir things are an emp’y sang
  To a gentleman like me.        20
It’s a different thing that I demand,
  Tho’ humble as can be—
A statement fair in my maker’s hand
  To a gentleman like me.
A clear account writ fair an broad        25
  An’ a plain apologie;
Or the deevil a ceevil word to God
  From a gentleman like me.

Shakespeare · Bible · Strunk · Anatomy · Nonfiction · Quotations · Reference · Fiction · Poetry
© 1993–2015 · [Top 150] · Subjects · Titles · Authors · World Lit.