87. A Ceres

REGARDE, ô Ceres la grande,

Danser la rustique bande

Des laboureurs assemblez

A la semence des bledz:

Fay que le grain ne pourrisse

Par la pluie, et ne perisse

Par l’hyver trop avancé

Le sillon ensemencé.

Que la malheureuse avéne

Ne foisonne sur la plaine,

Ny toute autre herbe qui nuit

Au grain dont vient le bon fruict.

Qu’un fort vent meslé de gresle

Ne renverse pesle mesle

Le blé sur terre haulsé

De telle fureur blessé.

Que les oyseaux qui ravissent

Du froument ne se nourrissent,

Ny ces monstres d’animaulx,

Qui font par tout tant de maulx.

Mais fay que le champ nous rende,

Avec une usure grande,

Les grains par nous enserrez

Soubs les sillons labourez.

Ainsi sera. Qu’on espanche

Un plein pot de créme blanche,

Et du miel delicieux,

Coulant avecques vin vieux.

Que l’hostie inviolée,

Avant que d’estre immolée,

Par trois fois d’un heureux tour

Cerne ces bledz à l’entour.

C’est assez. Moissons parfaictes,

Autres festes seront faictes,

Et seront tes cheveux saincts

D’espicz couronnez et ceinctz.