Heathcote William Garrod, comp. (1878–1960). The Oxford Book of Latin Verse. 1912.

Martial c.A.D. 40–c.A.D. 104

Saturnalia

VNCTIS falciferi senis diebus,

regnator quibus imperat fritillus,

uersu ludere non laborioso

permittis, puto, pileata Roma.

risisti; licet ergo, nec uetamur.

pallentes procul hinc abite curae;

quidquid uenerit obuium, loquamur

morosa sine cogitatione.

misce dimidios, puer, trientis,

quales Pythagoras dabat Neroni;

misce, Dindyme, sed frequentiores.

possum nihil ego sobrius; bibenti

succurrent mihi quindecim poetae.

da nunc basia, sed Catulliana:

quae si tot fuerint quot ille dixit,

donabo tibi passerem Catulli.